Një lojë e re prej Klemens Kalickit, atij që ka bërë edhe lojën e njohur familjare Little House! Vëzhgues natyre me eksperiencë sillen vërdallë me guxim nga ana-tjetrës, e shkojnë të shohin çfarëdo bime, kafshe e gjëje me duf. Me terezi nxjerrin në punë gjithë ç’kanë mësuar - nëpër livadhe e mes barishteve dallojnë lehtë brejtës të vegjël, e po qenë ata andej, s’është çudi të dalë pas pak një hut, një dhelpër, a edhe ndonjë nepërkë! Meadow është lojë tavoline ku hyjmë në rolin e shëtitësve që rrinë e vrojtojnë natyrën. Me një hartë në dorë, bredhim nëpër ato anë piktoreske, kërkojmë frymëzim e kapim pamje që të marrin mendtë. Na shtyn pasioni e kurioziteti, po na tundon edhe gara për ta marrë titullin e vëzhguesit më të zoti të natyrës! Ky titull i bie atij lojtari që mbledh më shumë pikë për speciet e kafshëve e të bimëve që ka vëzhguar, për peizazhet dhe kujtimet që ka mbledhur gjatë rrugës. Gara vazhdon edhe rreth zjarrit të kampit, ku lojtarët ndeshen mes tyre për të arritur qëllimet e ekspeditës së vet.